Copy

Ilisimatusarfik newsshaping the Arctic

Una saqqummersoq aasap tungaanut kingulliuvoq .. tulliani nutaarsiassiissusiamik saqqummiussissaagut, ulloq 01. septembari


Soraarummeerluni inerneq

 
Ullumi ataasinngorneq juunip 26-iani 2017.

Peqqissaanermik Ilisimatusarfimmi, Ilisimatusarfiup immikkoortortaani peqqissaasunngorlaat arfineq pingasut angusarissaaqalutik soraarummeerlutik allagartartaarput.

Peqqissaasutut naammassisut Peqqinnissaqarfiup iluani sulilissallutik, ukuuppullu: Birthe Magdaline Tabia Rasmussen, Karen Mette Zeeb, Lisa Ivalu Lind Jensen, Nielsigne Petrine Petersen, Nivi Maline Magdaline Sara Willumsen, Paninnguaq Carla Willumsen Lyberth, Paarma Egede Lund & Tupaarnaq Pauline Lennert Evaldsen.

Pilluaritsi.


Ilinniartitsisunngortut

 
Tallimanngorneq 16 juuni nal. 10.00 Qassimi ilinniartitsisunngortunik Ilinniarfissuarmi allagartartaartitsilluta nalliuttorsiussaagut.

IlinniartitsisunngortutAjaaja Gabrielsen, Amma Kvist, Aviâja Thorin, Christina Knudsen, Erik Pedersen, Hanne Dorph, Helga Løvstrøm, Kunuunnguaq Kleist, Maaliaaraq Nielsen, Ludvig Nathansen, Nive Kielsen, Nivi Fly, Nivi Frederiksen, Nukanngiuaq Jensen, Kristine Olsvig, Paneeraq Jensen, Pilunguaq Olesen, Paana Frederiksen Lund, Rita Nielsen Mørch, Rita Stidsen & Samuel Lange.

Pilluaritsi.
Ann Eileen Lennert's PhD defense, 27 June 2017 | watch it now on our YouTube channel


Nepalimi obstetrikimi praktikkerneq

 
Peqqissaasunngorniap Naduk Eriksenip semesterit arfernanniittup allataa

Inuiaat allat piorsarsimassutsikkut inooriaasaat pissanganartittuaannarnikuugakku Kalaallit Nunaat qimallugu praktikkernissara soqutigilernikuuara, qujanaqisumillu Nepalimi obstetrikkimi praktikkernissannut nuannerluinnartumik akuerisaallungalu periarfissarsivunga. 

Global Contact, Mellemfolkeligt Samvirke-mut atasuuvoq, kaannersuarmik piitsuussusermillu akiuiniarnermik suliniarfiusoq, Global Contactilu aqqutigalugu praktikkernissara aaqqissuussimallugu. 

Nepalimukannginnitsinni Københavnimi aallarniutaasumik pikkorissarneqaqqaarallarpugut. Pikkorissarnitsinni ilinniartorpassuit nunani allanissaaq praktikkertussanik naapitsivugut. Pikkorissarnitsinni nunani ornitassatta kulturiannut suleriaasiannullu tunngasunik piareersarneqarpugut. 

Praktikkerneq

Kathmandup mittarfianut pigutta uippakajaarnassasoq siumut ilisimatinneqarpugut. Ilisimatereerneqarpugullu inuit mittarfimmiittut nassatatsinnik ikiuukkumassasut, nassatagulli tigoqqissagutsigit akilersikkumassasut.

Ilimagisatsitut apuukkatta uippakajaarnarpoq, angutilli marluk praktikkerfissatsinneersut mittarfimmut aavaatigut.

Nepalimiut inuiaajupput eqqasuuteqanngitsut eqqissisimaartullu, najugaqarfissatsinnullu ingerlaartilluta neriniartarfeeqqap silataani nalunaaquttap-akunnerata affaata missani napparsimaviup tunngaviliisua utaqqivarput, napparsimaviummi tunngaviliisua ataatsimeereerluni ilaassamaarmat angerlarluni. 

Filmimiittuusinarpoq Kathmandumiilluni, biilit motorcykelillu imminnut siggaqattaattut tupinnaqaallu angallannermik malittarisassat Europamisut inngitsut. Motorcykeleeraq ataaseq inunnik pingasunik ilaasoqarsinnaasarpoq, ilaasullu saniatigut puussiat angerlaassassat sinaani nivingasinnaasarput. 


Atuaruk website ..


Model Arctic Council

 
Asasagut ilinniagaqartut;

Ullorsiutinni ulloq arfininngorneq 16. september krydsileruk, tassanimi Inuit Ataqatigiit Folketingimi, Ilisimatusarfik peqatigalugu, uagut silarsuarput, Issittoq, pillugu ullormut pissanganartumut ilinniagaqartuususi qaaqquassi. ”Model Arctic Council”-imik taasarput aqqutigalugu issittumi nunani inuiaqatigiit unammilligassaannut tunngatillugu peqataatikkusuppassi isummassilu tusarusullugit. Model Arctic Council-imi ullormi ataatsimi issittup nunanut allanut ministeriisut aalajangiisartuisullu piusaartitsillusi atuutissaasi.

Suna
Pisussaq tuluttut ingerlanneqartussaq nunat tamalaat Model Arctic Council-iannut nunat issittut tamakkerlutik inuusuttaannit peqataaffigineqartumut misiliutaassaaq. Nunani tamalaani atassuteqaqatinut suleqateqariaaseq Arktisk Rådimilu soqutigisat assigiinngitsut akornanni sullissineq nutaaq ilisaritinneqassapput.

Kikkut
Oqallinnissamut pissanganartumut ingerlarsorfiusumullu kalaallit inuusuttorpassuit peqataanissaannut qilanaarpugut. Ilinniagaqartut tamarmik tikilluaqqusaapput, siornatigullu Model Arctic Council-imi imaluunniit Model United Nation-imi ataatsimeersuartuni peqataasimasuunissaq pisariaqanngilaq.

Sumi
Illisimatusarfik, Nuuk

Qaqugu
Arfininngorneq 16 septembari 2017

Sooq
  • Kalaallit Nunaanni Issittumilu politikkimik, unammillikkanik anguniakkanillu oqallisiseqarnissaq pillugu
  • Arktisk Rådimi suleriaatsit paasisaqarfiginissaat pillugu
  • Kalaallit inuusuttut Issittumi siuttussatut piukkussarnissaat pillugu
  • Avammut oqaaseqarsinnaanikkut, siuttuusinnaanikkut, diplomatiimut, isumaqatigiinniartarnernut politikkikkullu suleqateqarsinnaanermut sungiusarnissaq pillugu
Kalaallit Nunaata nunarsuatsinni atuuffianut, annertuutigut politikkernermut Issittumilu nunanut allanut suleqateqarnernut tunngasutigut ullormi sammisaqarnissatsinnut takunissat qilanaarivarput.

Sukumiinerusumik paasissutissat pisortatigoortumillu qaaqqusissut aasaanerani feeriarfik qaangiuppat, tassa aggustimi 2017-mi, saqqummiutissavagut.

Inussiarnersumik inuulluaqqusillunga;

Aaja Chemnitz Larsen
 

Briefing note #5

 
Rachael Lorna Johnstone & Anne Merrild Hansen, Issittumi Uuliasiornernik gassisiornernillu misissuinernut Professorit & Issittumi Uuliasiornernut gassisiornernullu Ilisimatusarfimmut pisortat 
 
I maj 2017-imi maajimi, innuttaasut naapinniarlugit aammalu nunap immikkoortuani ineriartornermut neriuutaat aarlerissutaallu ilikkagaqarfiginiarlugit, Kalaallit Nunaata kujataani illoqarfiit Qaqortoq aamma Narsaq tikeraarpagut. Illoqarfiit taakkua aatsitassarsiorfissat marluk, Tanbreez-ip suliaqarfiata aamma Kuannersuarni suliaqarfiup, qanitaanni inissisimapput. Inuit nunap immikkoortuani siunissami periarfissanik isiginnittaasit aammalu aatsitassarsiorfissat ineriartornermut sunniuteqarnissaannut naatsorsuutigisaat aammalu aningaasaqarnikkut ineriartortitsinissamut periarfissaqarfiusut allat pillugit naapeqatigalugit oqaloqatigaavut.

Katillugit inuit 17-it naapeqatigaavut, ilanngullugit Kommune Kujallermit (Kalaallit Nunaata kujataani Kommuni), suliffissuarnit aatsitassarsiortunit, takornariartitsisartunit, savaatilinnit, ilinniartitaanermit, kulturilerisunit, politiinit, suliffissuarnut sullissisartunit aamma avatangiisinut peqatigiiffinnit, (Urani Naamik! e. Urani, Nej Tak!) aallartitat aammalu najukkani inuiaqatigiinni inooqataasut.

Isumaqarpugut aatsitassarsiorfiit arlaannaalluunniit aatsitassarsiorluni misissuinerup immikkoortuaniiginnaraluartut, suliassat najukkami innuttaasunut annertuumik sunniuteqalereersimasut. Pingaartumik aatsitassarsiorfimmik ingerlatsilernissap ilimanaateqarnera, sivisuumik tunisassiornissamut akuersissummik tunniussinissamut (imaluunniit itigartitsinissamut) suliap ingerlaneranut ataqatigiissillugu, najukkani innuttaasut akornanni neriuutaarutsitsillunilu ilatsiinnalersitsisimavoq. Aatsitassarsiorfimmik ingerlatsisoqalersinnaaneranut tapersersuisut aammalu akerliusut, aalajangiisoqarnissaa imaluunniit minnerpaamilluunniit qaqugu aalajangiinissaq naatsorsuutigineqarnersoq pillugu paasissutissiisoqarnissaa, erinitsaappaat. Nalorninartumiinnerup siunissami pilersaarusiornissaq imaluunniit suliffissuarni tapertaasussani imaluunniit unammillertaasinnaasuni aningaasaliinissaq, ajornakusoortippaa. Sunniutaasoq taanna Qaqortumut sanilliullugu Narsami ersarinneruvoq. 


Atuaruk website ..


Andreas Møller Jørgensen ph.d.-liaminik illersuilerpoq


Tallimanngornermi aggustip 18-ianni Andreas Møller Jørgensenip ph.d.-liani qulequtalik ”The power inherent in e-democracy – Greenlandic Experiences, Practices and Visions” Ilisimatusarfiup auditoriaani Ilimmarfimmiittumi illersussavaa nal. 13.00.


Ilisimatuutut misissukkanik saqqummiussineq


Juulimi aggustimilu ilisimatoortatta ilaasa ilisimatuutut misissukkaminni suliaannik saqqummiussissaagut.

Ilisimatuutut misissukkat makku alakkarsinnaassavatit: 
Ilisimatuutut misissukkanik suli allanik saqqummiussisoqarumaarpoq.

Ilisimatoortatta misissukkaminnik saqqummiussinerat Ilisimatusarfiup campusiata Ilimmarfiup initaani qullermi alakkarneqarsinnaavoq.

Kikkut tamarmik tikilluaqqusaapput.


Saqqummersitsineq #HereIStand


Iluarsaaqqinnerup ukiunik 500-nngortorsiutigineqarnerani juulimi aggustimilu saqqummersitsissaagut #HereIStand-imik qulequtalimmik, Martin Luther-imut tunngasoq, the Reformation and its Consequences. 

Saqqummersitsineq Tyskit Aallartitaqarfiata Kulturimik Immikkoortortaqarfianit atukkiussaavoq.

Martin Luther pillugu saqqummersitsineq Ilisimatusarfiup campusiata Ilimmarfiup initaani qullermi alakkarneqarsinnaavoq.

Kikkut tamarmik tikilluaqqusaapput.


Tamanut ammasumik oqallinneq


Uarcticip aggustip 14-ianiit 17-ianut ataatsimiinnerata Ilisimatusarfimmi pisussaanera iluatsillugu ataasinngornermi aggustip 14-ianni immikkut qaaqqusanik tamanut ammasumik oqallitsitsisoqassaaq qulequtalimmik ”inuiattut nukittorsarnermi nunarsuarmioqataajartornermilu oqaatsit pingaarutaat”.

Oqallittussatut qaaqquneqarput inuit assigiinnngitsunik atorfillit, tunuliaqutallit soqutigisallillu.

Oqallitsitsineq pissaaq Ilimmarfiup nerisarfiani nal. 20.00 - 21.30.

Tamassi tikilluaqqusaavusi.


Ilisimasatit siammartikkit - ilisimatusaatinik saqqummiussinermik pikkorissarneq


Inatsisit tunngaviusut pillugit bachelorinngorniutit kalaallinut soqutiginarsaruk. Pinerluuteqarsimasunik nalunaarsukkani oqaluttuassanik soqutiginartunik nassaarsiorneq ilinniaruk. Kinguppaat (raajat) aningaasarsiornermut oqaluttuarisaanermullu pingaarutaat kilisaatip qaavaniit qanoq nasuiarsinnaanerlugu misiliguk.

Aasaru aggustimi Ilisimatusarfik pikkorissartitsissaaq ilisimatusaatinik saqqummiussinermut. Tusagassiornermi periaatsit atorlugit ilisimatuutut ilisimasat inuinnarnut paasissutissiissutiginissaannut tunngasut peqataasunit ilinniarneqassapput. Ilisimatuutut paasisat pikorissartut namminneq toqqakkatik qanoq radiukkut aallakaatitassiarisinnaallugit podcastiliarisinnaallugilluunniit KNR suleqatigalugu ilinniassavaat.

Pikkorissarneq Ilisimatusarfimmi ilinniartunut ammavoq ECTS-pointinik pissarsissutaasinnaalluni, aammali avataaneersunut aamma ammavoq.

Ugguna paasisaqarnerugit ilanngunnissamullu nalunaarlutit ..

Saqqummersitat


Atuisutta nittartakkatsinni website periarfissaq nutaaq takusinnaavaat: ilisimatuut saqqummersitaannik ujarlertoqarsinnaavoq.

Atuakkiortoq, qulequtaq, imarisaa il.il. ujarneqarsinnaapput.

Saqqummersitanut quppernerput nutarterneqartuarpoq - taamaattumik suliamut tunngasunut isumassarsiornissamut alakkaagit.

Ilisimatuumik ujarlerneq


Immikkut ilisimasalimmik amigaateqarpit - assersuutigalugu ilanngutassiassamut imaluunniit assigisaanut?

Taamaappat ikiortissaq qujanartumik uaneralaannguamiippoq.

Nittartagarput website aqqutigalugu nalunaarsuutinik peqarpugut, ilisimatuunik assigiinngitsunik immikkut ilisimasalinni ujarlernissamut periarfissalik.


Pisussat


Ilisimatusarfimmi assigiinngitsunik aaqqissuussisarpugut - tamanut soqutiginaatillit.

Piffissami aggersumi soorlu, aaqqissuunneqassapput makku:
Nittartagarput website aqqutigalugu pisussat pereersullu atuarsinnaavatit.

YouTube live streaming ..


Tusagassiuutit


Qaammammi kingullermi Ilisimatusarfik tusagassiuutikkut assigiinngitsunik taaneqartarpoq:

Nittartagarput website aqqutigalugu tusagassiuutikkut taaneqarsimanerit pillugit atuarsinnaavatit.
Ilisimatusarfik | Grønlands Universitet | University of Greenland

Postboksi 1061 | 3900 Nuuk | www.uni.gl | mail@uni.gl | Oq.toqq. +299 38 56 00
Aaqqissuisut - attavissat ..
Facebook
Twitter
Instagram
YouTube
LinkedIn






This email was sent to <<Email Address>>
why did I get this?    unsubscribe from this list    update subscription preferences
Ilisimatusarfik | Grønlands Universitet | University of Greenland · Postboks 1061 · Nuuk 3900 · Greenland

Email Marketing Powered by Mailchimp